Le venezuelan Chavez propone un cura pro le insomnia del infantes

CARACAS, VENEZUELA - In uno de su numerose apparitiones televisive, le Presidente venezuelan Hugo Chavez enunciava su cura personal pro le infantes qui non vole ir al lecto: guardar su discursos televisive.

Chavez narrava que plure pueros le stoppava in le strata pro dicer que illes le guarda in le television.

"Il sembla que alcun matres, in vice de inviar lor infantes al lecto con le designos animate, les face addormir con Chavez" ille diceva.

"E le infantes oscita e oscita, e Chavez parla e parla e parla. E le infantes cade addormite" adjungeva le loquace leader, ben cognoscite pro su torrential discursos que dura per horas. Chavez, in ultra a occupar quasi tote le spatio televisive del dominica con su transmission personal "Holla Presidente", interrumpe frequentemente le transmissiones televisive in le altere dies pro parlar de quecunque argumento.

Proque expectar?

WARDYKES, ANGLATERRA - Un dicto commun del seculo passate recitava: "si tu vole vider que devenira le filia in vinticinque annos, guarda su matre". Evidentemente, lo que un citatano de Wardykes, Anglaterra ha vidite placeva bastante a ille: assi ille decideva de non expectar tanto e, post haber divorciate ex le filia, sposava le matre. Le filia ha declarate al jornalistas: "Si ille pensa de revenir a me quando mi matre disflorara, ille erra grandemente!"

Le conflicto medie-oriental se extende al Europa

BRUXELLES — Dum le carros de combatto israelian entra in Gaza e Hamas invoca le guerra total, Europa parla con voces diverse, jammais assi dividite e incerte. Le francese Nicolas Sarkozy, ex-presidente de torno del UE condemna decisemente le attacco de Israel. Ma le governamento tchec, qui substitueva illo francese in le presidentia, e le sra Merkel, Prime Ministro german affirma non minus decisemente que illo de Israel es un action defensive. In ultra, le Commission Europee se dismarca con un sic «no comment». In Italia, in linea con su tradition anarchic, totes es contra totes anque in le governamento Berlusconi: le ex-ministro del politica estranier del previe governo Berlusconi accusava le actual ministro de esser un "fifone" (termine dispreciative pro "pavide", anglese "funk")

Como parve ceresia sur le torta del disastro general, in iste momento duo delegationes europee circui in Oriente Medie e visita le mesme capitales pro le mesme objectivo, i.e. pro excogitar qualque fissura de mediation: illo official del UE, guidate per le Alte Representante pro le Politica Estranier Javier Solana, e illo inviate per le Francia e guidate per Sarkozy.

Jammais como ora Europa necesserea de intervenir con un strategia concorde in le crise que se aperiva a un passo de proprie domo, le qual non es guerra ma qualque cosa de assatis plus periculose: illo es un operation de un policia occidental contra un secta fanatic, supportate per le governamento iranian, qui vole eliminar ex le Oriente Medie omne presentia occidental.

Un altere ration pro considerar fallite le idea de Europa del Patrias, e revenir al idea de Adenauer, Schumann, Spinelli del Patria europee.

Le retorno del Inspector Clouzot

JERUSALEM - Si le immortal inspector Clouzot esseva appunctate a investigar in re le responsabilitates del situation de Gaza, le resultatos non esserea plus absurde e ridicule del theses proponite in iste dies per plure politicos. Recorda vos le methodo de Clouzot? Ille enumerava un serie de eventos futile, in relation superficial inter se o con le objecto del investigation, postea eliminava ex le lista del indiciatos le belle femina qui esseva le suspectato n. 1 solmente quia ille la amava e in fin ille annunciava que le culpabile esseva le victima mesme o qualque improbabile conspirator occulte.

Duo dies retro, inter le massacro general, un bomba de 1 tonna ha occidite le chef terrorista Nizar Rayan con un de su quatro sposas, tres filios e cinque vicinos. In le mesme dies altere 400 personas, cuje sol culpa esseva probabilmente trovar se troppo vicin al punctos de cadita del bombas israelian, moriva. In vice, Nizar Rayan esseva note como un del leaders plus violente, instigator de numerose attentatos contra le civiles.

Immediatemente, un portavoce de Hamas indiceva le "die del ira" e pois diceva: "Postea iste crimine, tote le optiones es aperte, includite le operationes de martyrio pro contrastar le aggression e colpar le interesses sionista ubique". Non un parola pro le altere 400 victimas. Ma pote un chef terrorista lamentar se si ille es objecto del mesme violentia que ille practicava?

Heri, in le die del ira, un decena de rocchettas esseva jectate ex le Banda de Gaza contra le territorio israelian. Nemo capiva le differentia inter iste rocchettas e illos del septimanas passate: esque forsan istos esseva plus inrabiate?

Durante que le bloco del frontiera con Gaza continua, excepte pro le estranieros, un delegation del UE visitara a partir de deman le capitales del Oriente Medie con le objectivo de obtiner "un immediate stop del foco que pone fin tosto al perdita de vitas human". Il non es clar si solmente le israelianos debe stoppar le foco, o anque Hamas. Le governamento israelian ha declarate que acceptara le armistitio solmente se le lanceamento de rocchettas terminara. Ma totes sape que le rocchettas es fornite per le iranianes, e que le population civil de Gaza pote facer nihil pro stoppar le lanceamentos. Amnesty International denunciava le "disproportion" del responsa israelian. Il non resulta que Amnesty International denunciava in le passato le "disproportion" del rocchettas jectate sin alcun ration per Hamas contra Israel, o le "impolitessa" del attentatos suicida contra le autobuses o le discothecas israelian.

In conclusion, le imbroliamento medie-oriental es semper plus imbroliate, e nulle solution se intervide. Anque in iste caso le homines ostende lor visage pejor, e le recerca del culpabile servi solmente a confunder le cartas in tabula.

Turchia, con ir a est se approxima al occidente

Pueros kurde

Istambul - ab nostre inviato special

Il essera pro un calculo politic pro le proxime electiones de martio, o forsan pro satisfacer le requestas de Bruxelles, in omne caso in le 2009 alcun transmis- siones radio-televisive essera in lingua kurde, cosa usque hodie prohibite.

Secun alcun voces semi-official, le decision "reflecte le tentativa del Governamento de garantir al communitate kurde plus derectos".

Anque le television national turc transmittera programmas in lingua kurde.

Commentario del Oculo - nos pensa que isto es un altere parve passo in le direction del Patria europee, in vice del idea fallimentar de Europa del Patrias.

Sur le strata del integration politic de Europa

Como io ha scribite in le articulo previe "Avantages e sperantias del crise economic", le crise economic preter riscos terribile offere a nos opportunitates historic. In particular, le situation del economia europee pote devenir assi problematic de imponer un innovation politic sin precedentes, un ver governamento economic supernational del zona euro.

Usque pauc septimanas retro le hypothese de un Euroconsilio, avantiate inexpertemente a octobre per Nicolas Sarkozy, esseva irrealista. Merkel e Sarkozy es distante sub omne profilo, e le duo economias ha structuras dissimile, como lor directiones divergente demonstra. In ultra, on prevideva un diminution moderate e temporanee del PNB (Producto National Brute), administrabile con le amortisatores traditional: sed, si le reporto del ministerio del Economia de Berlin - publicate per le pressa german qualque dies retro e que estima un diminution del PNB de plus que le 3% in le 2009 - es ver, le crise inducera le Germania, locomotiva de Europa, a essayar de coordinar le stimulos pro le reprisa economic insimul con le Paises vicin, cuje crescita es indispensabile al exportationes germanic tanto plus quanto plus le economia statounitense restara in stato critic (le nova que le euro superava quota 1,42 contra dollar es de heri).

Il es evidente hodie que le Germania sol non pote facer toto, illo necesse trovar un responsa cooperative de parte del Paises partner. E a isto es lo que un governamento commun servi. Le distribution del costos e del beneficios inter regiones e inter generationes pote de facto esser gerite solo per un institution de natura politic.

Le crise offere multe altere rationes pro un passo decise verso le integration politic. In caso de risco de contagion financiari inter Paises, solo un action commun pote intervenir preventivemente. Le Governamentos national de facto cura le crises solo quando illos se manifesta. E le experientia proba que le Governamentos national non ama recognoscer le debilitates del proprie bancas e que illos non sape remarcar le riscositate de lor balancios. Le "Financial Stability Review" publicate lunedi per le BCE (Banca Central Europee) signala de facto que le ratas de mercato resta alte nonobstante un diminution del ratas official de 175 punctos base quia le bancas continua a timer un «choc significative de liquiditate». Le fundo de duo milles milliardos de euros annunciate a octobre per le UE (Union Europee) - e antea ancora justo ex le reunion del Governamentos del euro - in favor del bancas, esseva requirite solo per un decimo, justo quia, sin ligamines de coordination, omne Governamento national tende a garantir al bancas solmente id que es indispensabile pro flottar. In tal modo le institutos de credito es incentivate a evitar omne damno al proprie balancio con limitar le financiamentos e assi frenante le economia del proprie Pais. In ultra, le regulationes national del systhemas bancari va differentiar se, facente plus difficile le politica monetari commun.

Le crisi presente deberea constringer le Governamentos europee a pensar in modo innovative. Anque con renunciar a plure privilegios del soveranitate national. Si de facto le crise del 1929 esseva transformate in tragedia per le protectionismo commercial, illo presente risca de esser aggravate per le protectionismo politic. Governamentos non cooperative pote facilemente developpare politicas nocive le uno al alteres e reproducer le circulo vitiose del protectionismo del annos '30.

Le 2009 es le anno del electiones politic europee e il es del toto rationabile que le thema del crise e del integration europee essera al centro de un debatto commun. Le presidentia del UE essera totevia conducite per duo Paises que non resalta pro lor fiducia in le integration politic, Republica Tchec e Svedia. Ergo, un initiativa pro le euro es del toto rationabile, mesmo pro preservar le institutiones UE. Angela Merkel potera attender in januario, quando Sarkozy quitara le Presidentia del UE e illa potera revenir a controlar le partita europee, ma certemente illa non potera celar se a longe.

Avantages e sperantias del crise economic

Per le redactor del section geopolitic del Oculo

In Italia, usque le augusto passate le inflation galopava e le gasolina costava plus que le auro. In septembre, gratias al implosion de SUA, le requesta global iva a fundo trainante le precio del petroleo. Ora il ha le risco de deflation, sed non plus de inflation (a termino medie). Le effecto combinate de reduction del precios e del ratas in SUA e Europa equivalera, a breve, a un stimulo fiscal de 10 per cento circa pro le rentas medie/basse.

Super le plano geopolitic le crise ha cancellate le scenario de fin del occidente e de emersion de nove Potentias mundial, primemente China e India. Sin le traino del locomotivas statounitense e europee, iste Paises, dependente per le export e per le precios del materias prime, es in crises economic tal que on pote conjecturar etiam revertimentos de lor regimes.

In le Oriente Medie le temibile fundos soveran, que vadeva entrar in punctos clave del economia europee, ha registrate perditas terribile. Le rentas petrolifere, que los susteneva, es collabite al puncto que varie Paises del area, inter que alcun "Statos canalia", va faller. Le planos nuclear iranian esseva stoppate. Palestinos e Israelianos ha recomenciate tractar.

Si nove caditas non se verificara, le balancio del crise economic resultara positive. Sed il essera assi?

Isto depende de quando le SUA partira de novo e del re-financiamento del economia o no. Le Statos Unite forsan initiara a reprender se in le estate proxime, sed con crescita insufficiente a trainar le resto del mundo. Le industria de financiamento, discreditate al oculos del investitores, restara depresse e isto facera mancar capital. Le Europa essera paralysate, condemnate per su modello inefficiente, le euro a risco de dissolution. Al fin de render productive le crise, il necessitara usar lo como motivo de tres innovationes:

1. integration del locomotiva american in reparation con illo - mesmo si ruinate - europee, con crear un accordo euro/dollaro, anque al fin de salvar le prime e reinfortiar le centro economic del planeta;
2. regulamentation efficace del mundo financiari global, sin incaviar lo sed pro restituer lo nove capacitates de levator e assi facer revenir abundante le capital pro le investimentos;
   
3. stimulation del evolution democratic del regimes chinese, russe, iranian etc. pro evitar a illos nationalismos bellicista, con conditionar los.

Re iste fronte, le periculo major es que Obama stringe un pacto diabolic con le chineses: in cambio del soldos de Peking, lassar mano libere a China sur le fronte geopolitic. Europa restarea emarginate e in le difficultates. Pro iste ration, le Paises europee deberea subito dar nove impulso al processo de integration politic, anque in le optica de un futur Federation del Statos Unite de EurAmerica.

Marito violente essaya de assassinar su sposa con un coclear de cocina

in le photo: le sposa aggredite post le assalto fallite

PALENCIA, ESPANIA - Le clientes de un bar de Palencia impediva a un homine de aggreder su sposa, qui se refugiava in le sala persequite per le marito con un coclear de 13 cm de lamina e le intention de assassinar la.
Le femina se refugiava in le bar petente adjuta quia su marito voleva assassinar la, e subito postea le aggressore entrava brandiente un terribile coclear de cocina. Le clientes del bar succedeva in retener le usque le Policia le arrestava e le portava al Commissariato de Policia de Palencia ubi ille es detenite in custodia, accusate de tentativa de aggression culinari contra su sposa. (Fonte: elmundo.es)

Commentario del Oculo - Il sembla que in su prime interrogation, al demanda: "proque non prendeva tu un furchetta o un cultello?" le homine respondeva: "Quia esseva resultate mal le suppa de verdura, non le rostito de bove"

AETERNA ROMA

ROMA - Google e le Commun de Roma creava un "machina del tempore" que permittera de visitar Roma Antique ab omne parte del mundo sin levar nostre cul ex le sedia. Sur le schermo de vostre pc, pixel post pixel, le Colosseo, le Foros Imperial, le Arco de Constantino, le Circo Maxime apparera in 3D como illos esseva 1.700 annos retro. Isto es probabilmente le plus imponente simulation architectonic-urbanistic unquam facite: on pote vider le imagines de plus que 6.000 edificios del epocha.
Ma non solmente. In le monumentos principal (un decena, con le Templo de Venere), on pote entrare, visitar los, guardar los a 360 grados, aggrandir le particulares. In summa, un experientia unic realisate per le Universitate del California (nove sede del Imperio Roman) con expertos italian.

Le burgomaestro de Roma diceva que in un proxime futuro, in le area del Foros Imperial e del Colosseo, le touristas potera portar un casco con un visor virtual e un systema satellitari GPS. In base a ubi illes es e al direction in que illes guarda, le systema transmittera sur le visor le imagines del reconstruction virtual del Roma Imperial.

Isto es toto, pro le momento... No, que negligente, io oblidava de dar vos le adresse del Machina del Tempore!

A revider vos in le Colosseo (io in tribuna como imperator e vos in le arena como gladiatores)

CVRATE VT VALEATIS (essayate de restar san)

Presidentiales 2008: le mundo va gyrar pagina

Obama e Robama festa le victoria - photo Interlingua

Ferrara (Italia) e Chicago (SUA), 5 novembre - ab nostre inviatos special

In le mesme dies, le election del sr. Robama Cap a Presidente de Interlingua Italia (que totes cognosce, n.d.R.) e del sr. Barak Obama a Presidente de SUA (le Statos Unite de America, n.d.R.) initiava un nove pagina de Historia, plure commentatores politic hodie affirmava quando le notitia que anque le candidato american succedeva in devenir Presidente arrivava.
Le sr. Obama declarava a nostre inviato: "Io ha regratiate mi amico Robama Cap pro su incoragiamento, e io ha dicte a ille que sin su grande victoria forsan io non esserea Presidente hodie. Ille denegava isto, ma vos tote sape quanto ille es modeste".

Le commentatores computa que milliones e milliones de personas iva a votar in iste electiones, le plus elevate numero de semper.

Commentario del Oculo - Nos opina que le responsabilitates major e le mission plus ardue occureva al sr. Robama Cap, ma anque le sr. Obama non habera carga facile. Bon vento a totes.

Le responsa italian al crise financiari: retro al fundamentos, con phantasia

Diesel XXX Porno pro tote le familia

ITALIA - Le crise financiari investiva anque le mundo del fashion, fundate super le mesme philosophia ("il es melior apparer que esser") que esseva al base del crise mesme. Ma in Italia iste philosophia es temperate per un fundo de disincanto latin: assi le societate de fashion Diesel produceva un video ironic que dissacra le mytho del porno. Miscente alcun imagines porno con designos animate, le video de Diesel vole significar que anque le sexo plus explicite, si on guarda con oculos disincantate, es apparentia.

Qui debe pagar le disastro financiari? Joe le plumbero dice: Io no

Joe le Plumbero - facie a facie con Obama


Heampstead, S.U.A. - 16 octobre 2008

Le protagonista absolute del ultime debatto inter John McCain e Barack Obama esseva Joe le Plumbero, le nove symbolo del americano medie a qui per le tote soirée le duo candidatos se adressava con le  promitter le un vita melior.
Joe non es un figura de phantasia ma un ver plumbero del Ohio, qui un septimana ante stoppava Obama in fin de un reunion de propaganda elettoral demandante: "Proque vole tu penalisar me si io compli le Sonio American?"
Postea, Joe narrava que, anque si ora ille es plus tosto eligibile pro le reduction del taxas proponite per Obama, ille vole acquirer le societate ubi ille labora e isto le facerea ganiar plus que 250000$ per anno, le nivello super le qual Obama vole in vice augmentar le taxas.

In le debatto televisive McCain se appellava a Joe dicente (in synthese): "Si io vince, io te adjuvara a acquirer le societate ubi tu labora, io te mantenera basse le taxas e io offerera a te e a tu empleatos un assistentia sanitari que vos essera in le condition de sustener". Probabilmente, McCain non offereva a Joe su esposa solmente quia ille es vetule e non plus formosa.
Obama, in vice, replicava que Joe habeva misinterpretate su proposition, e que ille non vole augmentar le taxas a Joe.

Commentario del Oculo - Nos opina que isto es le initio del grande debatto mundial in re: Qui va pagar le disastro financiari e economic que S.U.A. donava al planeta? Nemo esseva surprendite de apprender que Joe le Plumbero non vole esser del gruppo de voluntarios...

Bon Novas 1 - Nove Jersey (SUA) mitte in pension le carnifice

NOVE JERSEY, S.U.A. - 14 decembre 2007

Pro le prime vice in plus de 40 annos un Stato de SUA ha abolite le pena de morte. Le Senate del Nove Jersey approbava le abrogation del executiones capital e le Governator Jon Corzine, un Democratic qui jam in passato se exprimeva a favor del abolition del pena capital, hodie signava le decreto.

Isto evene in le vigilia del voto al ONU del proposition de morotorio mondial del pena de morte, e durante que le debatto in re le pena capital se intensifica in le SUA. Dum 1099 personas esseva executate post que le Corte Supreme re- autorisava le pena capital in 1976, le rata de executiones diminueva in le recente annos como consequentia del dubitas surrecte in re si le procedura plus frequentemente usate, le injection lethal , viola le banno constitutional de omne "punition cruel e inusual". Le executiones esseva stoppate in le SUA durante que le Corte Supreme considera le argumento. New Jersey ha devenite le 14me Stato sin pena capital, dum altere 36 Statos, le Governo Federal e le fortias armate de SUA lo retene.

In januario un Commission del Nove Jersey resolveva que le pena de morte esseva expensive, sin effecto preventive del crimine e con le risco de occider personas innocente..

Commentario del Oculo - Nostre modeste blog initia con iste notitia a dar evidentia del Bon Novas mundial. Omne Bon Nova essera signalate per un photo del Colosseo (Roma) illuminate, quia le Colosseo es le symbolo plus importante del tenebras del humanitate. Un vice tanto, le Oculo non face burla...

Schumacher al volante de un taxi pro non perder le avion

COBOURG, GERMANIA - Secun quanto reportate per le jornal germanic Abendzeitung, postea confirmate per le portavoce del ex pilota Ferrari, Michael Schumacher se poneva al guida de un taxi, un monovolumine, al fin de arrivar in tempore al aeroporto de Coburgo: ille riscava de perder le avion. Sr Schumacher, insimul con su sposa e su filios, esseva arrivate a Coburgo pro retirar un can ab un habitante de un village vicin. Al retorno, durante que ille esseva a bordo de un taxi que lo portava al aeroporto, essente preoccupate de pervenir in retardo, "Schumi" rogava de poter mitter se al volante del automobile: assi ille succedeva a arrivar in tempore pro le partita.

Sr Tuncer Yilmaz, proprietario del taxi, declarava: "Io me ha retrovate sedente al latere del chauffeur e io habeva juxta me Schumacher: il esseva incredibile!".

"Ille faceva plure surpassos incredibile - ille prosequeva - e faceva le curvas a grande velocitate". In fin del cursa, le ex pilota germanic ha pagate a Yilmaz le tarifa debite e, in plus, lo dava un bon gratification.

Commentario del Oculo - Le aspecto plus incredibile del affaire es que il sembla que le sr Schumacher non infringeva alcun regula del Codice stratal germanic, mesmo si ille conduceva como le automobilista medie italian o espaniol!

Eurostar dissuade le viagiatores de biber the sur le trainos per London

LONDON - Eurostar, le compania que gere le traino a alte velocitate inter Paris e London, lanceava in novembre le campania de publicitate al fin de attraher belgas e franceses in le capital anglese. In effecto, le nove servicio de traino coperi in minus de duo horas le trajecto Paris-Bruxelles-London col passar per le tunnel submergite del Canal del Manica. Totevia, forsan al fin de evitar que le fin palatos continental es traumatisate per le forte sapor del bibita national anglese, le interprisa de transporto ferroviari decideva de promotionar le tourismo londinese con un elegante tassa de the... e un 'hooligan' con le capite tonse qui pissa in le recipiente.

Commentario del Oculo - Probabilmente, le aviso aspira a dissuader le viagiatores continental de affrontar le costumes de vita anglese "troppo rapidemente", al fin de evitar traumas irreparabile. On debe comprender que le pissar in le tassa de the es un forma traditional de autodefensa del populo anglese.

Directrices del acclamationes suspendite quia exhibiva le posteriores

RIPON, California

Sex de octo DdAs (Directrices del Acclamationes, anglese 'cheerleaders') del instituto de education secundari superior de Ripon non potera exequer "una vice ancora" post que le dirigentes scholastic las expelleva ex le campo de football american e las suspendeva per duo dies quia illas altiava lor gonnellas durante un canto de Britney Spears.

(Clicca ici pro spectar un video del hasardose exhibition del DdAs in le sito Modesto Bee )

Le pueras diceva a Modesto Bee que illas voleva finir le saison con un nota acute, assi illas decideva - incitate per le parentes - de concluder lo que illas ha definite "un saison odiose" con un provocatori routine de salutation culminante con le exhibition instantanee de lor posteriores nude accompaniate per le declamation del supernomine del schola, "Indians."

Commentario del Oculo - Que Deo las benedice!

Presidente Hugo Chavez non ha in animo de offerer le altere gena

CARACAS, Venezuela — Presidente Hugo Chavez non ha in animo de offerer le altere gena post que recipeva un colpo de palma verbal per le rege espaniol Juan Carlos al principio de novembre.

Al contrario, le orgoliose leader de sinistra del Venezuela mitteva apertemente in guarda Espania que su Pais non necessita le le investimentos espaniol, e ille attende que le rege offere immediate excusas.

"Le rege perdeva le testa," Chavez diceva a un incontro politic depost pauc dies. "Ille deberea dicer: '... Io, le rege, admitte que io ultrapassava le limite e faceva un error.' "

Le incidente international occurreva in un summit del leaders de America Latin, Espania e Portugal in Chile, durante que Chavez accusava le ex Prime Ministro Jose Maria Aznar de haber appoiate un colpo de stato que removeva lo brevemente ab le poter in 2002, e repetitemente appellava Aznar "fasciste". A un certe puncto, immortalisate per un celebre video divenite tosto popularissime sur YouTube (TuTubo), le rege interrumpeva Chavez exclamante: "Proque tu non tace?"

Chavez novemente parlava del incidente durante un conferentia-pressa, repetente su demanda de excusas, accompaniate con un velate menacia de retorsion.

"Ille mancava de respecto a me, e se monstrava al mundo in tote su arrogantia ma anque in su impotentia", Chavez diceva al jornalistas. "Espania ha plure investimentos, companias private hic.... le investimentos espaniol in Venezuela non es indispensabile. ... Nos non besonia lor" e postea Chavez mentionava le bancas espaniol Banco Santander SA e Banco Bilbao Vizcaya Argentaria SA.

"Qualcunque cosa esseva privatisate, pote esser expropriate novemente", Chavez diceva al agentia Reuters. "Si le governamento espaniol initia a generar un conflicto, le cosas non va a ir ben."

Recordante le historia del colonisation espanion in America latin, Chavez definiva le interlocution del rege "un reflexo de 500 annos de arrogantia."

Commentario del Oculo - Il es possibile que nos erra, ma Chavez appare multo ben incamminate sur le strata de plure dictatores, sudamerican e non.

Nove Zelanda denega le immigration a un femina anglese quia "troppo ponderose"

Le citatanos anglese Rowan Trezise, 33, e su marito Richie Trezise, 35, es vivente separate durante que illa effortia se a perder le kilogrammas requirite pro reentrar in le lineas de guida nove zelandese concernente le salutar Indice de Massa Corporee (IMC) que le immigrantes debe mantener. IMC es le ration peso/talia que indica le percentage de grassia corporee. Le Servicio de Immigration de Nove Zelanda require que tote le candidatos se subjecta a un complete examine medical, includente le mensuration del "circumferentia de cinctura".

Iste regulamento esseva verisimilmente instituite pro rationes de budget. Le systema sanitari national non pote dar se le licentia de aperir su portas a immigrantes in excesso de peso, un portavoce del organisation nove zelandese "Lucta al Obesitate Epidemic" explicava al Daily Mail.

Richie Trezise succedeva in reducer su linea de cinctura de 5 cm, abassante su IMC e permittente lo de interprender le prime passo verso le sonio del sposos de stabilir se in Nove Zelanda.

Rowan Trezise es sol in le Regno Unite e ancora lucta.

In un interview con un jornal, Richie Trezise admitteva su sposa ha difficultate a perder peso — un difficultate que pote fortiar le sposos a abandonar lor planos de ultramar e remaner in le Regno Unite pro tranquillitate.

(Fonte: Daily Mail)

Commentario del Oculo - Ecce quia le equipa national nove zelandese de rugby esseva battite in le recente Cuppa del Mundo: lor campiones ha debite perder peso al fin de non esser expellite de lor Pais.

25 sequitores del 'Antichristo' se concentra in Madrid

MADRID - Un total de vinticique inter feminas, juvenes e pueros se reuniva sabbato in Madrid al fin de dar le colpo de gratia al Ecclesia Catholic, culpabile de "haber mentite per 2000 annos". Le gruppo, que exhibiva vistose tatus, esseva convocate per su leader, le portoricano Jose' Luis de Jesus Miranda, qui se reputa 'le Antichristo'.
Totevia, le gruppo renunciava al demonstration quia le policia los informava que "oblidava de rogar le autorisation in tempore". Pro iste vice, le Ecclesia Catholic succedeva assi a salvar se.

Fonte: El Mundo

Bulgaria, films porno al halto del bus

Al fin de "distraher le passageros del frigido" e offerer un modo alternative de "passar le tempore durante le expectativa", le firma public del transportos bulgare de Sophia transmitte films porno al halto del bus.
Le notitia esseva referite per le edition britannic de Metro que justo explica como le monitor utilisate pro monstrar le horarios del buses es usate, in le horas nocturne, pro transmitter films soft-porno.
Un portavoce del Union Europee commentava que "isto es le demonstration que facer parte del UE ameliora le qualitate del vita de citatanos". De facto, Bulgaria entrava in le UE desde le 1 januario de iste anno.